Bugun “Nasaf” Pepsi Superligasining 26-turi doirasida Olmaliqning AGMK jamoasiga qarshi maydonga tushadi. Uchrashuv “OKMK” sport majmuasida soat 18:00da boshlanadi.
“Nasaf” va AGMK jamoalari shu paytgacha milliy chempionatimizda o‘zaro 22 marta kuch sinashgan. O‘tgan uchrashuvlarning 3tasida olmaliqlik futbolchilar g‘alabaga erishishgan. 11ta uchrashuvda “Nasaf” zafar quchgan, yana 8 o‘yinda durang natija qayd etilgan. To‘plar nisbati quyidagicha ko‘rinish olgan – 19:32. Ustunlik “Nasaf” tomonida.
Olmaliqda jamoalar o‘zaro 11ta tuqnash kelishgan. Bularning 2tasida “konchilar” zafar quchishgan. 5ta uchrashuvda durang qayd etilgan. To‘rt uchrashuvda esa “Nasaf” g‘alaba qozongan. Olmaliqdagi o‘zaro uchrashuvlarda darvozalarga jami 19ta to‘p kiritilgan. To‘plar nisbati bo‘yicha 8:11 ustunlik “Nasaf” tomonida.
“Ajdarlar” bugun milliy chempionatimizdagi 644-uchrashuvini o‘tkazishadi. Jamoamiz ustozi Ro‘ziqul Berdiyev esa o‘z shogirdlarini 177-marta maydonga boshlab tushadi.
