“Nasaf” deganda bir insonni uning yoniga qo‘shmasdan gapirib bo‘lmaydi. Bu inson ham “Nasaf”siz hayotini tasavvur qila olmaydi. Bu maqomga u faqat o‘zining mehnati va fidoiyligi bilan sazovor bo‘lgan.

Bugun mana shunday inson, O‘zbekistonda xizmat ko‘rsatgan yoshlar ustozi, “Nasaf” jamoasining bosh murabbiyi - Ro‘ziqul Berdiyev 47 yoshga to‘ldi.

U 1997 yildan beri “Nasaf” bilan birga. 2008 yilda professional futbolchilik faoliyatini yakunlab murabbiylar shtabiga qo‘shildi. Ro‘ziqul Berdiyev, “Nasaf” safida 314 marta maydonga tushgan futbolchi va juda ko‘p mavsumda jamoaga sardorlik ham qilgan.

Berdiyev shuningdek 408 marta maydonga tushib, mamlakatimizda eng ko‘p maydonga tushgan faxriy futbolchilar qatorida ham turadi. Ro‘ziqul Berdiyev“Nasaf” klubi bosh murabbiyiligida chempionatimizda 4ta bronza va 1ta kumush medal qo‘lga kiritildi.

Shuningdek, jamoamiz yana bir martadan O‘zbekiston Kubogi va Superkubogida ham zafar quchdi. 4 marta esa O‘zbekiston Kubogi finalchisi bo‘ldi. 3 marta O‘zbekistonning eng yaxshi murabbiyi bo‘lgan Berdiyev, 5 marta Osiyo Chempionlar ligasida “Nasaf” bosh murabbiyi sifatida ishtirok etdi. Sa’dullayevich bosh murabbiylik faoliyatida uch karra mamlakatimizning eng yaxshi murabbiyi sifatida e’tirof etilgan.

«Nasaf»ni milliy chempionatimizda 177 marta maydonga boshlab tushgan Berdiyev, 106 marta raqiblarini dog‘da qoldirdi. Berdiyev haqida bundanda ko‘p ijobiy fikrlarni aytish mumkin.

“Nasaf” PFK rahbariyati, murabbiylari, futbolchilari hamda vohalik futbol ishqibozlari nomidan u kishini bugungi tavallud ayyomi bilan samimiy tabriklaymiz. Ro‘ziqul Sa’dullayevichga sihat-salomatlik, uzoq umr va baxt saodat tilaymiz. Oila a’zolari baxtiga va barcha futbol muxlislari baxtiga doimo bor bo‘ling! Siz bizning ardoqli kishilarimizdan birisiz! Zafarli g‘alabalarda xamisha birga bo‘laylik! Tilagimiz, har doim shunday elimiz ardog‘ida bo‘ling!

Tug‘ilgan kuningiz muborak bo‘lsin!