Milliy jamoalarning o‘rtoqlik uchrashuvlari sababli yuzaga keladigan tanaffus vaqtida ko‘plab ishqibozlar futbolda to‘xtalish qilib, sergaklikni yo‘qotishadi. Vaholanki, aynan shu davrda millionlar o‘yinida ko‘plab qiziqarli voqealar kuzatiladi.
Jumladan, oktyabr oyi o‘rtalarida ham diqqatga molik hodisalar guvohiga aylandik va ulardan 10tasini saralab, fotojamlanma tarzida aziz o‘quvchilar bilan baham ko‘rishga qaror qildik.
1. XAMESNING G‘AROYIB GOLI
«Bavariya» yarim himoyachisi Xames Rodriges AQSH termasi darvozasini ajabtovur tarzda ishg‘ol qildi, Kolumbiya jamoasi esa yakunda 4:2 hisobida zafar quchdi.
2. USEYN BOLTNING DASTLABKI GOLLARI
Avstraliyaning «Sentral Kost Meriners» klubida ko‘rikda bo‘lib turgan yamaykalik sprinter professional futboldagi ilk gollarini urdi.
3. ANGLIYALIKLAR ILK BOR TRIBUNALARI BO‘SH STADIONDA O‘YIN O‘TKAZISHDI
Xorvatiyalik muxlislarning tartibsizliklaridan so‘ng shunday jazo qo‘llandi. Ammo Riyekaga tashrif buyurgan angliyalik ishqibozlar o‘yinni stadionga tutash tepalikdan turib kuzatishdi.
4. KONDOGBIYA FRANSIYA EMAS, MAR TERMASIDA O‘YNAYDI
FIFA Fransiya milliy jamoasi safida o‘rtoqlik uchrashuvida o‘ynagan Joffri Kondogbiyaning Markaziy Afrika Respublikasi termasida to‘p surishiga ruxsat berdi.
5. SALOH BURCHAK ZARBASIDAN GOL URDI
Misrliklar Esvatini Qirolligi termasini 4:1 hisobida mag‘lubiyatga uchratishdi. Muhammad Saloh esa kamyob gollardan biriga mualliflik qildi.
6. 18 YOSHLI FUTBOLCHIDAN CHIROYLI GOL
Londonning «Arsenal»iga tegishli bo‘lgan, ayni payt Germaniyaning «Xoffenxaym» klubida o‘ynayotgan angliyalik Ris Nelson Andorra U-21 termasi darvozasini tovoni yordamida ishg‘ol qildi.
7. TOP-LIGADAGI SERMAHSULLIK TERMADA DAVOM ETTIRILDI
O‘z chempionatida to‘purarlik qilayotgan Pako Alkaser, Andre Silva hamda Kshishtof Pyontek termadagi o‘yinlarda ham maydonni golsiz tark etishmadi.
8. O‘ZGARMAS ARNAUTOVICH
Millatlar ligasi doirasida Shimoliy Irlandiya darvozasini ishg‘ol qilgan avstriyalik Marko Arnautovich muvaffaqiyatni o‘zgacha tarzda nishonladi: sardorlik bog‘ichini yechib, uni havoda hilpiratdi.
9. GERMANIYA UCHUN DAHSHATLI TUN
Gollandlarga 0:3 hisobida yutqazgan germaniyalik futbolchilar jamoa tarixida ilk marta qatorasiga uchta rasmiy uchrashuvda gol urolmadilar. «Bundestim» bosh murabbiyligida 168-uchrashuvini o‘tkazgan Lyov esa rekord o‘rnatdi.
10. POYABZALI IPINI BOG‘LAGANI UCHUN...
Kiyevning «Arsenal» va «Dinamo» jamoalari o‘rtasidagi uchrashuvning 37 daqiqasida yarim himoyachi Ahmed Alibekov atayin vaqtni cho‘zish maqsadida butsalarining ipini bog‘lagani uchun hakam tomonidan chetlatildi.
Abdulloxon ISROILXONOV tayyorladi
