O‘zbekiston futbol assosiasiyasi kelasi yilning yanvar oyida Osiyo kubogiga tayyorgarlik ko‘rayotgan O‘zbekiston milliy terma jamoasi uchun o‘rtoqlik o‘yinlari tashkil qilishda davom etadi.
O‘zbekiston terma jamoasi sentyabr oyida Suriya va Eron, oktyabrda esa KXDR va Qatar terma jamoalariga qarshi Toshkentda o‘rtoqlik o‘yinlari o‘tkazdi.
Noyabr oyidagi FIFA kunlaridan ham unumli foydalanish maqsadida, O‘zbekiston MTJ uchun noyabr oyida ikkita o‘rtoqlik o‘yini tashkil qilinadi.
15 noyabr kuni vakillarimiz Livan terma jamoasiga qarshi to‘p sursa, 20 noyabr kuni Janubiy Koreyaga qarshi o‘rtoqlik o‘yini o‘tkaziladi. Har ikki uchrashuv Avstraliyaning Brisben shahrida bo‘lib o‘tadi.
Eslatib o‘tamiz, Osiyo kubogi 2019 yilning 5 yanvar - 1 fevral kunlari Birlashgan Arab Amirliklarida bo‘lib o‘tadi.
