Ispaniyaning “Barselona”, “Atletiko” va Angliyaning “Liverpul” futbol klublari hamda Ispaniya terma jamoasining sobiq futbolchisi Luis Garsiya Toshkentda yosh o‘zbek charm to‘p ustalari uchun mahorat darslari o‘tkazadi.
Ma’lumki, 28 oktyabr kuni Ispaniya La-Ligasi doirasida barcha muxlislar orziqib kutayotgan bahs — mavsumdagi birinchi “El-Klassiko”si bo‘lib o‘tadi. O‘zbekiston PFL va La-Liga o‘rtasidagi kelishuvga muvofiq, “Barselona” va “Real Madrid” o‘rtasidagi mazkur uchrashuv ommaviy tarzda ham namoyish etiladi. Ushbu o‘yin Toshkentdagi “Milliy” stadionida tomoshabinlarga havola etiladi.
UzDailyning yozishicha, mazkur tadbir doirasida ispan futboli muxlislarini turli sovg‘alar kutmoqda. Dastur avvalida o‘zbek estradasi yulduzlari ishtirokida konsert o‘tkaziladi.
Shundan so‘ng san’at yulduzlari o‘zbek futbolining yaqin o‘tmishdagi yulduzlariga qarshi maydonga tushadi.
Shuningdek, Luis Garsiya yosh futbolchilar uchun mahorat darsi o‘tkazadi. Va La-Liga elchisi Luis Garsia hamda PFL elchisi xonanda Shahzoda (Zilola Musayeva) ikki mamlakat futbol ligalari nomidan muxlislarga sovg‘alar ulashadi.
Tadbir so‘ngida stadionga o‘rnatilgan katta ekranda “Barselona” – “Real Madrid” o‘yini namoyish etiladi.
