"Paxtakor" yarim himoyachisi "Navbahor" bilan bahs arafasida jamoa tayyorgarligi va raqib to‘g‘risida fikrlari bilan qiziqdik.

Uchrashuvga tayyorgarlik qanday ketmoqda? Jamoaning ruhiy holati qanday?

- O‘zbekiston Kubogi finalidan keyin yigitlar tushkun holatga tushishdi. Chunki mag‘lubiyat judayam alamli bo‘ldi. Nasib qilsa, superligada qolgan besh uchrashuvda g‘alaba qozonib, chempionlik uchun oxirigacha kurashishni oldimizga maqsad qilib qo‘ydik. Finalda biz kutilmagan va alamli mag‘lubiyatga uchradik. Buni barcha tushunib turibdi. Barchamiz birgalikda chempionlik uchun kurashishga intilamiz.

"Navbahor" haqida qanday fikrdasiz?  

- "Navbahor" yaxshi va shakllangan jamoa. Tarkibida kuchli o‘ynaydigan futbolchilari bor. Ularda yangi murabbiy ish boshlagan. Ushbu mutaxassis rahbariyat oldida o‘zini ko‘rsatish uchun jamoasini bellashuvga puxta tayyorlaydi. Har bir jamoa "Paxtakor"ga qarshi 2-3 baravar ko‘proq kuch bilan o‘ynaydi, o‘zining kuchli jihatlarini namoyish etishga intiladi. Biz muxlislarimiz uchun chiroyli o‘ynab, g‘alaba qozonamiz degan umiddaman. Ishqibozlarimizdan qarzdormiz. Qolgan 5 o‘yindagi muvaffaqiyat bilan ularning ishonchini oqlashga urinamiz.