O‘zbekiston futbol assosiasiyasi yurtimizda bolalar futbolini rivojlantirish, yosh avlod o‘rtasida sog‘lom turmush tarzini targ‘ib qilish, futbolni yanada ommaviylashtirish maqsadida bir qator chora-tadbirlarni amalga oshirib kelmoqda. Bu borada futboli rivojlangan Yevropa mamlakatlari tajribalari o‘rganilib, bir qator kuchli mutaxassislar yurtimizga taklif qilinyapti.

Jumladan, shu yilning iyun oyida O‘zbekiston futbol assosiasiyasi va "Real Madrid" klubi akademiyasi o‘rtasidagi kelishuvga asosan yurtimizga Real Madrid Foundation Clinic dasturi bo‘yicha “Qirollik klubi”ning mutaxassislari tashrif buyurishgani xaqida xabar berib o‘tgan edik.

Tashrif davomida ispaniyalik mutaxassislar  ishtirokida bolalar futboli mutaxassislari uchun nazariy seminarlar tashkil qilinib, amaliy mashg‘ulotlar ham o‘tkazildi. Shuningdek, "Real Madrid" akademiyasi mutaxassislari yosh futbolchilar uchun master-klasslar ham o‘tkazishdi.

O‘FA va "Real Madrid" klubi o‘rtasidagi hamkorlikning ikkinchi bosqichiga ko‘ra, shu yilning sentyabr-oktyabr oylarida yurtimizdagi bir qator iqtidorli bolajonlar Madridga safar uyushtirishdi. Ular Madridda "Real" klubi akademiyasi, bosh jamoa mashg‘ulot o‘tkazadigan maydon, Santyago Bernabeu" stadioni bilan yaqindan tanishib, mutaxassislardan futbol sir-asrorlarini o‘rganishdi.

Endilikda "Qirollik klubi" mutaxassislari o‘zaro hamkorlining uchinchi bosqichi doirasida yana O‘zbekistonga tashrif buyurishadi. Bu safar ular viloyatlardagi hududuiy futbol akademiyalarida bo‘lib, u yerda tarbiyalanayotgan yosh futbolchilar uchun mahorat darslarini o‘tab berishadi.

11 noyabrdan 20 noyabrga qadar Surxondaryo, Buxoro, Andijon viloyatlari hamda Qoraqalpog‘iston Respublikasida bo‘lib o‘tadigan mahorat darslarida mahalliy futbolchilar va bolalar futboli mutaxassislari ishtirok etishadi.