Zamonaviy futbolning rivojlanishi bilan birgalikda, uning atrofidagi yuridik jihatlar bo‘yicha muammolar, bahsli vaziyatlar ham ko‘paymoqda. Professional klublar hamda futbolchilar o‘rtasida tuzilgan mehnat shartnomalari har doim ham futbol qoidalari va normativlariga to‘la javob beravermasligidan kelib chiqib, mavjud muammolarni bartaraf etish, o‘zbek futbolida yuridik talab-qoidalarning ustuvorligini ta’minlash, huquqiy bazaning ishlashiga erishish maqsadida O‘FA va PFL tomonidan 18 noyabr kuni maxsus seminar tashkil etiladi.     Seminarda Superliga va Pro-liga klublarining sport direktorlari, yuristlar, lisenziyalashtirish bo‘yicha menejerlar ishtirok etib, sohadagi so‘nggi yangiliklar bilan yaqindan tanishish imkoniga ega bo‘lishadi. O‘FA birinchi vise-prezidenti Umid Ahmadjonov topshirig‘i bilan tashkilotning xavfsizlik masalalari bo‘yicha bo‘limi mutaxassislari San’at Sharipov bilan birgalikda shu yilning sentyabr oyida Moskvada bo‘lib, yuqoridagi masala bo‘yicha bir qator uchrashuvlar o‘tkazgandi.  Uchrashuv davomida O‘zbekistonda ham futboldagi huquqiy masalalar bo‘yicha seminarlar tashkil etish bo‘yicha kelishuvga erishilgandi. Ana shu kelishuvga asosan  18 noyabr kuni bo‘lib o‘tadigan seminarda Rossiya futbol ittifoqining huquqiy masalalar bo‘yicha mas’ul shaxslari — Denis Rogachev, Konstantin Lyaxov, Daniil Zamorinlar ma’ruza o‘qishadi.    Professional futbol ligasi 2019 yilgi mavsum uchun klublarni lisenziyalash talablariga jiddiy e’tibor qaratadi. Bunda tashkilot birinchi navbatda klublarning futbolchi va murabbiylar bilan tuziladigan shartnomalariga ahamiyat qaratadi.

PFL davlat korxonalari, hokimliklar va davlat ulushi bo‘lgan kompaniyalar tomonidan moliyalashtiriladigan futbol klublariga FIFA talablari asosida ishlab chiqilgan bir xil ko‘rinishdagi shartnomalar tarqatadi. Klublarning futbolchi va murabbiylar bilan tuzilayotgan shartnomalari qanchaga mo‘ljal qilingani borasidagi ma’lumotlar barcha uchun ochiq bo‘ladi. Shartnomalarning buzilish holatlari PFL tomonidan jiddiy nazorat qilinadi.        Seminarda shu va shu kabi masalalar muhokama qilinib, yig‘ilganlar huquqiy bilimlarni yangilash imkoniyati taqdim qilinadi.