Xabaringiz bor, O‘zbekiston milliy terma jamoasi 15 noyabr kuni Avstraliyaning Brisben shahrida Livan terma jamoasiga qarshi o‘rtoqlik o‘yinida maydonga tushadi. Terma jamoamiz futbolchilari va murabbiylar shtabi kecha tunda Toshkentdan yo‘lga chiqishdi.
Avvalroq Brisben shahriga tashrif buyurgan O‘zbekiston delegasiyasi rasmiylari bugun Livanga qarshi o‘rtoqlik o‘yini bo‘lib o‘tadigan "CBUS Super Stadium" o‘yingohiga tashrif buyurishdi va bu yerdagi sharoitlar bilan yaqindan tanishishdi.
Shuni alohida ta’kidlash kerakki, stadionda sharoitlar a’lo darajada muhayo qilingan.
Stadion 27 000 nafar muxlisga mo‘ljallangan bo‘lib, bu yerda "Gold coast United" futbol jamoasi uchrashuvlarni o‘tkazadi. Bundan tashqari, "Gold coast Titans" regbi jamoasi ham shu stadionda ishtirok etadi.
O‘yingohda 25 nafar futbolchiga mo‘ljallangan ikkita kiyim almashtirish xonasii, muzli basseyn, jakuzi mavjud. Shuningdek, murabbiy futbolchilar bilan nazariy o‘quv jarayonlarini o‘tkazish uchun alohida xona ham bor. Stadion chimi a’lo darajada, sifatli va chiroyli futbol namoyish qilish uchun tayyor.
Umid qilamizki, milliy terma jamoamiz 15 noyabr kuni ushbu stadionda Livanga qarshi uchrashuvda mazmunli o‘yin ko‘rsatib, yurtimizdagi millionlab futbol muxlislarini xursand qilishadi.
