O‘zbekiston futbol assosiasiyasi tomonidan yurtimizda bolalar futbolini rivojlantirish, yosh avlod orasida sog‘lom turmush tarzini targ‘ib qilish va futbolni yanada ommaviylashtirish maqsadida bir qator chora-tadbirlar amalga oshirilmoqda. Jumladan, hududlarda tashkil etilgan bolalar va o‘smirlar futbol akademiyalarida o‘quv jarayonlari sifatini oshirish maqsadida navbatdagi seminar tashkil qilindi. O‘quv-seminari Toshkent viloyati bolalar-o‘smirlar futbol akademiyasida o‘tkazilmoqda. Unda OFK instruktori Islom Ahmedov, O‘FA Akademiyalarni rivojlantirish boshqarmasi boshlig‘i O‘ngar Djalimov, shuningdek, O‘FA vakillari G. Ayrapetov, V. Vasiliyevich hamda hududiy futbol akademiyalar direktorlari, Sport ishlari bo‘yicha direktor o‘rinbosarlari hamda murabbiylar ishtirok etishmoqda.
Mazkur o‘quv-seminar 3 kun davom etib, O‘zbekiston futbol assosiasiyasi tomonidan ishlab chiqilgan dastur asosida o‘quv-mashg‘ulotlarning o‘tkazilishi, kunlik mashg‘ulot konspkktlarini yuritilishi hamda murabbiylar tomonidan mashg‘ulotlar tahlilini amalga oshirilishini muhokama qilishdan iborat. O‘quv-seminarning ikkinchi va uchinchi kunlarida maxsus bolalar ligasi - “Baby league” tizimini joriy etish hamda Respublika bolalar-o‘smirlar futbol akademiyasiga saralash bosqich musobaqasini tashkil qilish masalalari muhokama qilinadi.
