MISRDA MUHAMMAD SALOH SHARAFIGA TAYYORLANGAN HAYKALNI KO‘RSATISHDI
Jamoatchilik fikricha, Misr sportining birinchi raqamli sportchisi byusti portugaliyalik Krishtianu Ronaldunikidan ham yomonroq chiqibdi.
«Liverpul» hujumchisi sharafiga tayyorlangan haykaltaroshlik ishi ilk marta Misrning Sharm Al-SHayx shahrida o‘tkazilgan jahon yoshlar forumida namoyish etildi. U misrlik yoshlar uchun umid ramzi hisoblanar ekan...
Biroq Muhammad Saloh yaxshi tasvirlanmagan: bo‘yi juda past, boshi juda katta va qo‘l-oyoqlari juda oriq... Haykal muallifi - misrlik yosh haykaltarosh qiz May Abdul Allah. Uning o‘zi Egypt Independent nashri jurnalistlari bilan suhbatda haykal vositasida «Liverpul» goleadorining quchoq ochib fanatlar tomon yugurayotgan holatini imkon qadar aks ettirishga uringanini ta’kidladi.
Ko‘pchilik yaxshi biladi, Saloh odatda gollarini shunday nishonlaydi. To‘g‘ri, futbolchi aslida haykalda ko‘rsatilganidek, «yaqqol» tabassum ulashmaydi, shuningdek, boshi ham bu qadar katta emas.
Xullas, jahon futboli yulduzlari sharafiga o‘rnatilgan o‘xshovsiz haykallar soni yana bittaga ko‘paydi. Bu ketishda yaqin orada «dahshatnamo» ijod namunalaridan o‘ziga xos ramziy jamoa tuzish imkoni tug‘ilishi hech gap emas. Hozircha hujum chizig‘i tayyor - Krishtianu Ronalduning beo‘xshov «nusxa»si yoniga Salohniki ham qo‘shildi...
