Professional boksning super yarim o‘rta (-69,85 kg) vazn toifasida faoliyatini boshlayotgan Isroil Madrimov debyut jangidayoq chempionlik kamari uchun ringga ko‘tariladi. Bu haqda sportchining o‘zi ma’lum qildi.
24 noyabr kuni AQSHda, Atlantik Siti shahridagi “Mark G. Etess Arena“ saroyida bo‘lib o‘tadigan boks kechasida debyut qiladigan Madrimov shu kuni meksikalik Vladimir Ernandesga qarshi ringga chiqadi. Ernandes shu kunga qadar prof boksda 12 ta jang o‘tkazgan bo‘lib, ularning 10 tasida g‘alaba qozongan, 2 ta jangda imkoniyatni boy bergan.
Madrimov va Ernandes jangi 10 raundlik janglar sirasiga kiritilgan va unda WBA Intercontinental chempionlik kamari o‘rtaga qo‘yiladi. Mazkur boks kechasida, shuningdek, Shahram G‘iyosov va Murodjon Ahmadaliyev ham o‘zining navbatdagi janglarini o‘tkazadi.
Ma’lumot uchun: boks tarixida faqatgina bir marta — ukrainalik Vasiliy Lomachenko o‘zining debyut jangida chempionlik kamari uchun ringga chiqqan. Taqqoslash uchun: Murodjon Ahmadaliyev esa xuddi shunday kamarini to‘rtinchi jangida qo‘lga kiritgan.
