Toshkent shahrida o‘smir qizlar o‘rtasida qilichbozlikning sablya yo‘nalishi bo‘yicha jahon kubogi musobaqasi boshlandi.

Musobaqada jahonning 14 mamlakatidan 53 nafar sportchi ishtirok etmoqda. Kecha O‘zbekiston gimnastika federasiyasiga qarashli «Universal» sport saroyida ushbu nufuzli turnirning tantanali ochilish marosimi bo‘lib o‘tdi.

Tadbir tantanali kuy-qo‘shiqlar bilan boshlandi. Estrada xonandalarining chiqishlari marosimga ko‘tarinki rux bag‘ishladi. Yosh qilichbozlar ishtirokidagi ko‘rgazmali chiqish esa yig‘ilganlarda katta taassurot qoldirdi.

Ochilish marosimida O‘zbekiston Milliy olimpiya qo‘mitasi prezidenti Umid Ahmadjonov, Jismoniy tarbiya va sport vaziri Dilmurod Nabiyev, Toshkent shahar hokimi Jahongir Ortiqxo‘jayev, O‘zbekiston qilichbozlik federasiyasi raisi Rustam Shoabdurahmonov ham ishtirok etdi.

Tadbir davomida so‘zga chiqqanlar ushbu musobaqaning qay darajada ahamiyatli ekanligi, ana shunday nufuzli musobaqa O‘zbekistonga ishonib topshirilganidan mamnun ekanliklarini qayd etib o‘tdilar. Shundan so‘ng O‘zbekiston Respublikasi davlat madhiyasi yangradi va musobaqa rasman ochiq deb e’lon qilindi.

Qayd etish lozimki, mazkur jahon kubogi qimmatli reyting ochkolarini taqdim etishi bilan ahamiyatlidir. Yakkalik bahslarida g‘oliblikni qo‘lga kiritgan sportchi 32 reyting ochkosiga ega bo‘ladi. Jamoaviy bellashuvlarda g‘olib bo‘lgan terma jamoa esa 64 reyting ochkosini qo‘lga kiritadi. Kecha yakkalik bahslari bo‘lib o‘tdi. Bugun esa jamoaviy bellashuvlar tashkil qilinadi.