Xabaringiz bo‘lsa kerak, O‘zbekiston futbol assosiasiyasi hamda O‘zbekiston Professional Futbol Ligasi vakillaridan iborat maxsus komissiya a’zolari kecha, 21 noyabr, chorshanba kuni vodiyga safar uyushtirib, Qo‘qon va Namangandagi “Markaziy” stadionlarning bugungi xolati bilan yaqindan tanishgandi.

Kecha tunga yaqin ushbu komissiya a’zolari Namangandan Andijon shahriga ham tashrif buyurdi. Mehmonlarni “Andijon” futbol klubi bosh direktori Ma’rufjon Abdisalomov, viloyat futbol federasiyasi birinchi vise-prezidenti Bekzod Karimov, Viloyat jismoniy tarbiya va sport boshqarmasi boshlig‘i O‘tkirbek Toshpo‘latov, “Sog‘lom avlod” stadioni direktori Omonullo Mirzayev hamda klubning bir nechta ishchi xodimlari kutib oldi.

Samimiy va ishchi ruhda kechgan suhbat jarayonida stadionda qilinishi zarur bo‘lgan ishlar yuzasidan  gap bordi. Darvoqe, O‘FA va PFL vakillari stadionga tunda kelishgani ayni muddao bo‘ldi va ular “Sog‘lom avlod” stadionining yoritkichlari va maydon chimining bugungi xolati bilan yaqindan tanishdi. Unda O‘FA tomonidan biriktirilgan maydon ustasi Uchqunbek Quvanov o‘z maslahatlarini berib, “Sog‘lom avlod” stadionining maydonini talab darajasiga olib chiqish uchun yangitdan xorijdan keltiriladigan chim yotqizilsa maqsadga muvofiq bo‘lishini a’lohida ta’kidlab o‘tdi.

Bungacha “Andijon” futbol klubi rahbariyati ham maydonni talab darajasiga olib chiqish uchun boshqa maydon ustalari bilan muzokara o‘tkazib, ularning takliflari bo‘yicha ish boshlash arafasida turganligini klub bosh direktori Ma’rufjon Abdisalomov O‘FA va PFL vakillari bilan uchrashuvda aytib o‘tdi.

Hozirda maydonni bo‘lajak mavsumga yangitdan tayyorlash uchun bir nechta firmalar bilan muzokara jarayoni davom etmoqda. Tez kunlarda ularning biri bilan aniq to‘xtamga kelinib, rasmiy shartnoma tuziladi va “Sog‘lom avlod” stadionida bu bo‘yicha ish boshlanadi.

“Andijon” matbuot xizmati.