Sir emaski, O‘zbekiston Tokio 2020 Olimpiadasida o‘z oldiga ulkan maqsadlarni qo‘ygan. Vatanimiz bir yarim yildan so‘ng kunchiqar yurtda o‘tkaziladigan Olimpiya o‘yinlarida nafaqat lisenziyalar, balki medallar soni va sifati bo‘yicha ham rekordlarni yangilashni maqsad qilgan.
Bu borada Milliy olimpiya qo‘mitasida ish allaqachon boshlab yuborilgan. Shu maqsadda MOQda bir necha kundan buyon sport federasiyalari bilan uchrashuv tashkil qilinmoqda va Olimpiya o‘yinlariga tayyorgarlik keng muhokama qilinmoqda.
Bu safargi yig‘ilish O‘zbekiston stol tennisi federasiyasi vakillari bilan o‘tkazildi. Federasiya raisi Saida Mahmudova Milliy olimpiya qo‘mitasi ishchi guruhini Tokio 2020 Olimpiadasiga atab ishlab chiqilgan reja bilan tanishtirdi. Sportchilarimizning bugungi kundagi holati, Olimpiya o‘yinlariga lisenziya beruvchi musobaqalar haqida ma’lumot berdi. Shuningdek, oldinda turgan muammolar, kamchiliklar tahlil qilindi.
