Bugun bu yilgi Pepsi Superliganing quyi oltilikdagi jamoalari so‘nggi, 32-tur uchrashuvlarini o‘tkazishadi. “Nasaf” Jizzaxda “So‘g‘diyona” jamoasi bilan kuch sinashadi. Uchrashuv bugun, 29 noyabr payshanba kuni “So‘g‘diyona” stadionida soat 16:00da boshlanadi.
“So‘g‘diyona” va “Nasaf” jamoalari bugun milliy chempionat doirasidagi o‘zaro 38-uchrashuvini o‘tkazishadi. Bungacha bo‘lib o‘tgan 37ta uchrashuvning 7tasida “So‘g‘diyona” jamoasi g‘alaba qozongan, 29ta o‘yinda “ajdarlar”ning qo‘li baland kelgan. 1ta o‘yinda o‘zaro durang qayd etilgan. O‘zaro uchrashuvlarda 112 marta darvozalarga gol kiritilgan. To‘plar nisbati bo‘yicha ustunlik jamoamiz tomonida –31:81.
Mazkur jamoalar Jizzaxda o‘zaro 18ta uchrashuvda maydonga tushishgan. Bu uchrashuvlarda 5 marta “So‘g‘diyona” jamoasining, 13 marta “Nasaf”ning qo‘li baland kelgan. Jamoalar Jizzaxdagi o‘zaro uchrashuvlarda durang qayd etishmagan. Darvozalarga jami 48ta gol kiritilgan. Gollar nisbati bo‘yicha ustunlik jamoamiz tomonida – 14:34.
Bugun “ajdarlar” milliy chempionatdagi o‘zining 650-uchrashuvini o‘tkazishadi. O‘tkazilgan 649ta uchrashuvning 360tasida g‘alaba, 125tasida durang va 164tasida mag‘lubiyatga uchralgan. Jamoamiz ustozi Ro‘ziqul Berdiyev, o‘z shogirdlarini bugun (chempionat doirasidagi) 183-marta maydonga boshlab tushadi.
