Yevropa Ligasi 5-turida eng yaxshi o‘yin ko‘rsatgan va mahsuldorlik namoyish etgan futbolchilardan to‘rt nafari haftaning eng yaxshi o‘yinchisi nomiga da’vogarlik qilmoqda.

Bu safargi nominantlar sirasiga «Milan» yarimhimoyachisi Hakan Chalhano‘g‘li, «Chelsi» hujumchisi Olivye Jiru, «Sporting» xavbeki Bruno Fernandes va «Beshiktosh» yarimhimoyachisi Jermeyn Lens kiritilgan.

Chalhano‘g‘li «Dyudelanj»ga qarshi o‘yinda (5:2) darvozaga ikki marta aniq zarba yo‘llab, bitta gol urdi. Jiru esa PAOK yirik hisobda taslim etilgan bahsda dubl qayd etdi. Fernandes va Lens ham ikkitadan gol urgan bo‘lib, ular mos ravishda «Qorabog‘» (6:1) va «Sarpsborg» (3:2) mag‘lub etilgan o‘yinlarda o‘z jamoasi g‘alabasiga munosib ulush qo‘shdi.

Nomzodlarga UYEFA rasmiy saytining quyidagi sahifasiga o‘tish orqali ovoz berish mumkin.

Ma’lumot uchun, bunga qadar Kay Haverts («Bayer»), Leo Jaba (PAOK), Ruben Loftus-CHik («Chelsi») va Takumi Minamino («Zalsburg») YELda haftaning eng yaxshi futbolchilari bo‘lishgandi.