Европа Лигаси 5-турида энг яхши ўйин кўрсатган ва маҳсулдорлик намойиш этган футболчилардан тўрт нафари ҳафтанинг энг яхши ўйинчиси номига даъвогарлик қилмоқда.

Бу сафарги номинантлар сирасига «Милан» яримҳимоячиси Ҳакан Чалҳанўғли, «Челси» ҳужумчиси Оливье Жиру, «Спортинг» хавбеки Бруно Фернандес ва «Бешиктош» яримҳимоячиси Жермейн Ленс киритилган.

Чалҳанўғли «Дюделанж»га қарши ўйинда (5:2) дарвозага икки марта аниқ зарба йўллаб, битта гол урди. Жиру эса ПАОК йирик ҳисобда таслим этилган баҳсда дубль қайд этди. Фернандес ва Ленс ҳам иккитадан гол урган бўлиб, улар мос равишда «Қорабоғ» (6:1) ва «Сарпсборг» (3:2) мағлуб этилган ўйинларда ўз жамоаси ғалабасига муносиб улуш қўшди.

Номзодларга УЕФА расмий сайтининг қуйидаги саҳифасига ўтиш орқали овоз бериш мумкин.

Маълумот учун, бунга қадар Кай Ҳавертц («Байер»), Лео Жаба (ПАОК), Рубен Лофтус-Чик («Челси») ва Такуми Минамино («Залцбург») ЕЛда ҳафтанинг энг яхши футболчилари бўлишганди.