2018 yilning 8-9 dekabr kunlari Toshkent shahri Yunusobod tumanida joylashgan “Saxovat sport serviz” sport majmuasida yoshlar, o‘smirlar va kattalar o‘rtasida taekvondo ITF bo‘yicha O‘zbekiston Kubogi musobaqasi bo‘lib o‘tdi.
Ushbu musobaqada yurtimizning 12 ta viloyatidan 700 dan ortiq sportchilar ishtirok etib, jami 124 medallar jamlanmasi uchun bahslashishdi.
O‘zbekiston Kubogi musobaqasida Xalqaro taekvondo ITF federasiyasi prezidenti, Butun jahon yakka kurashlar va jang sa’nati IMGC prezidenti professor Ri Yong Son hamda Xalqaro taekvondo ITFfederasiyasi Bosh kotibi Kim Sung Hva ishtirok etishdi.
Xalqaro taekvondo ITF federasiyasi rahbarlari yurtimizda mazkur sport turining qay darajada rivojlanganligi, yurtimizda sport bilan shug‘ullanish uchun yaratilgan shart-sharoitlar bilan tanishdilar.
Yuqori martabali mehmonlar uchun Jismoniy tarbiya va sport vazirligi rahbariyati bilan uchrashuv tashkil etilib, yurtimizda 2019-2020 yillarda taekvondo ITF bo‘yicha jahon chempionati va jahon kubogi kabi nufuzli musobaqalarni tashkil qilish yuzasidan muzokaralar o‘tkazildi.
Musobaqaning yakuniy natijalarga ko‘ra umumjamoa hisobida birinchi o‘rinni Toshkent shahri, ikkinchi o‘rinni Buxoro viloyati, uchinchi o‘rinni Toshkent viloyati jamoasi qo‘lga kiritgan bo‘lsa, to‘rtinchi o‘rin Samarqand va Sirdaryo viloyati sportchilariga nasib etdi.
