Ma’lumki, Namanganning «Navbahor» klubi 14 yillik tanaffusdan keyin yana sovrindorlar safidan o‘rin olib, bronza medali sohibiga aylandi.
Albatta, ushbu muvaffaqiyatda jamoa yetakchilaridan biri Mirzohid G‘ofurovning ham munosib hissasi bor. Chunonchi, G‘ofurov bu yilgi Superliga bahslarida 29ta o‘yinda maydonga tushib, 1ta gol urdi. Ammo aynan Mirzohidning mazkur yagona goli evaziga «Navbahor» 10-tur doirasida safarda «Buxoro» ustidan g‘alaba qozondi (1:0). Biz yakunlangan mavsum borasida tajribali xavbek bilan suhbat uyushtirib, unga o‘zimizni qiziqtirgan bir necha savollar bilan murojaat etdik.
- Mirzohid, yakuniga yetgan mavsum sizda qanday taassurot qoldirdi?
- Ajoyib va o‘zgacha... Superliga bahslarini qisqa va lo‘nda qilib shunday ta’riflasak bo‘ladi. Ayniqsa, jamoamizning 14 yillik tanaffusdan keyin 3-o‘rinni qo‘lga kiritganligi barchamizga o‘zgacha zavq bag‘ishladi.
- Bu yilgi natijalar va shaxsiy faoliyatingizdan qoniqdingizmi?
- «Navbahor» qayd etgan natija ijobiy bo‘lganligi bois, jamoaviy o‘yindan ko‘nglim to‘ldi. Ammo o‘zim haqimda bunday deya olmayman. Chunki yanada yaxshiroq ko‘rsatkichlarga erishishim mumkin edi, aslida. Menimcha, futbolchi hech qachon o‘z o‘yinidan qoniqmasligi lozim. Shunda u o‘sishdan to‘xtamaydi.
- Superliganing yangi formatiga munosabatingiz...
- Klublarning 2ta guruhga ajratilganligi bahslarning yanada keskin hamda qiziqarli, kurashlarga boy tarzda o‘tishini ta’minladi. Umuman olganda, mazkur format to‘g‘risida fikrim ijobiy. Lekin ushbu format ilk marta qo‘llanilganligi uchun ayrim kamchiliklardan ham bor, menimcha. Bu borada O‘FA va PFL mutaxassislari bamaslahat ish olib borib, o‘tkinchi o‘yinlarning bo‘lmasligiga erishishadi, degan umiddaman.
- Muxlislar uchun yaratilgan sharoitlar va «onlayn» teletranslasiyalar haqida nima deysiz?
- Muxlislar to‘la stadionda to‘p surishning gashti va zavqi o‘zgacha bo‘ladi, albatta. Maydonda o‘zingni boshqacha his qilasan. Bundan tashqari, Superliga bahslarining televideniya orqali jonli tarzda namoyish etilishi futbolchidan o‘zgacha mas’uliyat talab qiladi hamda futbolimiz rivojiga ham ulkan hissa qo‘shadi.
- Jamoangiz uchun Superligadagi eng qiyin bahs qaysi bo‘ldi?
- Menimcha, «Navbahor»da oson o‘yinning o‘zi bo‘lmadi, hisob. Ayniqsa, mag‘lubiyatga uchragan bahslarimizda ancha qiyinchilikka uchradik.
- Jamoa legionerlari va yangi murabbiy - Andrey Kanchelskis haqida fikrlaringiz qanday?
- O‘zim futbolchi bo‘lganim uchun jamoadoshlarim to‘g‘risida faqatgina iliq fikrlar bildirishim mumkin. Andrey Kanchelskis esa o‘z dunyoqarashi va uslubiga ega murabbiy. Asosiysi, u yevrofutboldan bahramand inson. Shu bois, «Navbahor»ga ham «qo‘hna qit’a» havosini olib kirishga harakat qilmoqda.
- Bronza medallar - bu yilgi «Navbahor» uchun maksimal natijami yoki jamoa bundan ham yuqoriroq o‘rinni egallashga qodirmidi?
- O‘ylashimcha, yakuniy natijamiz qoniqarli bo‘ldi. Negaki, uchinchi o‘rin ham uzoq tanaffusdan keyin qo‘lga kiritildi. Axir, narvonga ham birdaniga emas, pog‘onama-pog‘ona chiqiladi. O‘tgan yili jamoamiz 5-o‘rinni egallagandi, bu yil esa 3-pog‘onani band etdi. Ehtimol, keyingi mavsumda chempionlikka ham erisharmiz.
- Aytingchi, akangiz Rashid G‘ofurov futbolni tanlashingizda qanday o‘rin tutgan?
- Futbolchi bo‘lishim va shu darajaga yetishimda albatta, Rashid akamning hissasi katta. Aynan akam tufayli millionlar o‘yiniga qiziqish orttirganimni ham alohida e’tirof etish joiz. Akam hatto hozir ham o‘yinlarimni kuzatib, o‘z tajribasidan kelib chiqqan holda, maslahatlarini berib turadi. Uning maslahatlariga amal qilib, kam bo‘lmadim. Fursatdan foydalanib, buning uchun Rashid akamga o‘z minnatdorchiligimni bildiraman.
- Qiziq, o‘z davrining eng kuchli futbolchilaridan bo‘lgan Rashid G‘ofurov ayni paytda nimalar bilan band?
- Ochig‘ini aytsam, akam hozirda futboldan ancha yiroqda, aniqrog‘i, biznes sohasida faoliyat yuritmoqda. Lekin bo‘sh vaqt topsa, albatta, butsalarini qidirishga tushadi (kuladi). Xullas, uning tadbirkorlikdagi faoliyatida ham futboldagi kabi omad yor bo‘lishini tilayman.
- Xabaringiz bordir, 14 dekabr kuni mavsum laureatlari nomiga oydinlik kiritiladi. Sizningcha, kimlar Superliganing «eng yaxshi»lari bo‘lishga munosib?
- Shaxsiy fikrimcha, eng yaxshi murabbiyga atalgan sovrin Mirjalol Qosimovga berilishi kerak. Chunki bu mutaxassis «Bunyodkor»dagi moliyaviy muammolarga qaramay, jamoa bilan mavsum so‘nggiga qadar sovrinli o‘rinlar uchun kurash olib bordi va Superligada o‘ziga xos «intriga»ni ushlab turdi. Eng yaxshi futbolchi sifatida esa «Lokomotiv» klubi va milliy terma jamoamiz hujumchisi Marat Bikmayevni ko‘rsatish mumkin.
- Kelgusi rejalar qanday? Sizni yangi mavsumda ham «Navbahor»da ko‘ramizmi?
- Shak-shubhasiz. 2019 yili ham «Navbahor»dagi faoliyatimni davom ettirib, jamoamiz bilan birga uzoq kutilgan chempionlik unvonini qo‘lga kiritaman, degan umiddaman.
Ma’lumot uchun
Mirzohid G‘ofurov - 1988 yil 22 avgustda Namangan viloyati Chortoq shahrida tug‘ilgan
Futbol bilan 6 yoshidan shug‘ullana boshlagan
Birinchi murabbiyi: Abdullo Jo‘raboyev
Namangandagi futbol maktab-internatini tamomlagan
Ampluasi: yarim himoyachi
Oilali, ikki nafar farzandning otasi
O‘ynagan jamoalari: «Navbahor» (Namangan) - 2006 yilning 2-davrasi - 2007 yil, 2009 yil; «UzDongJu» (Andijon) - 2008 yil; «NBU- Osiyo» (Toshkent) - 2010 yil; «Mash’al» (Muborak) - 2011 - 2014 yil, 2016 yil; «Bunyodkor» (Toshkent) - 2015 yil , 2017 yildan yana «Navbahor»da
