Xabaringiz bor, Milliy olimpiya qo‘mitasida sport federasiyalari bilan hamkorlikda Tokio 2020 Olimpiadasiga atab ishlab chiqilgan strategiya muhokama qilinmoqda. Bungacha yurtimizdagi ko‘plab sport federasiya va assosiasiyalari Olimpiya o‘yinlari uchun ishlangan rejalari bilan MOQni tanishtirishdi.
Bu safargi yig‘ilish O‘zbekiston o‘q otish sporti, shuningdek O‘zbekiston taekvondo WTF assosiasiyasi vakillari bilan o‘tkazildi.
O‘q otish sporti federasiyasi vakillari bilan uchrashuvda yil davomida amalga oshirilgan ishlar muhokama qilindi. Jumladan, federasiya bosh kotibi Jaloliddin Atabullayev bu yil viloyatlarda ochilgan bo‘limlar, xalqaro miqyoda olib borilgan ishlar, moddiy texnik bazani kuchaytirish bilan bog‘liq masalalar yuzasidan ma’lumot berdi. Shuningdek, murabbiylar malakasini oshirish bo‘yicha tashkil etiladigan seminar haqida gapirib berdi.
O‘zbekiston taekvondo WTF assosiasiyasi mutasaddilari bilan o‘tkazilgan yig‘ilishda ham tashkilotning yil davomida amalga oshirgan ishlari tahlil qilindi. Bundan tashqari, reyting turnirlarini muvaffaqiyatli o‘tkazib, Olimpiya o‘yinlariga tayyorgarlik ko‘rish masalalari muhokama qilindi. Terma jamoa sportchilari uchun tashkil etiladigan mashg‘ulotlar uslubi eskirganligi, bu borada jahonda yetakchi mamlakatlar tajribasini tatbiq etish lozimligi qayd etildi. Shuningdek, terma jamoa uchun yangi nomlarni jalb qilish kerakligiga e’tibor qaratildi.
