Xabaringiz bor, 17 dekabr sanasidan e’tiboran Superliga klublari yangi futbolchilar bilan tuzilgan shartnomalarni PFL ro‘yxatidan o‘tkazishi mumkin ekani ma’lum qilingan.

“Lokomotiv” futbol klubi matbuot xizmati “temiryo‘lchilar”ning yangi mavsum oldidan Azizbek Haydarov, Filip Rayevas, Yovan Jokich kabi futbolchilar bilan shartnoma imzolaganini e’lon qildi.

Oldinroq xabar berilganidek, PFL tomonidan 2019 yilgi mavsum uchun qo‘yilgan talablar ham borki, futbol klublari mana shu talablar ijrosini PFL bilan muhokama qilib olmaguniga qadar, birorta ham shartnoma ro‘yxatga olinmaydi. Bu jihat 14 dekabr kuni bo‘lib o‘tgan klub direktorlari bilan yig‘ilishda yana bir bor eslatib o‘tilgan.

2019 yilgi mavsum uchun lisenziyalash talablarida futbol klublari markazlashgan tibbiy ko‘rikdan o‘tishlari belgilab qo‘yilgan. Professional futbol ligasi tibbiy xulosalar asosida futbolchiga o‘z ligalarida o‘ynash huquqini taqdim etadi. 

Shu vaqtga qadar legioner futbolchilar bilan avval shartnoma tuzilgan va shundan keyingina ular tibbiy ko‘rikdan o‘tkazilgan. Endi esa shuning aksi bo‘ladi. Ya’ni, Superliga va Pro-ligalarning biror klubi legioner futbolchilar bilan shartnoma imzolamoqchi bo‘lsa, avval ularni rasman tibbiy ko‘rikdan o‘tkazadi.  Keyin esa shuning xulosasi asosida shartnoma imzolaydi. Mahalliy futbolchilar bilan masala ham shu yo‘sinda hal etiladi. Ushbu talablar barcha klublarga taalluqlidir.