Superliga ishtirokchisi “Andijon” jamoasi yangi mavsumga tayyorgarlik ishlarini boshlab yubordi.

Kecha jamoa a’zolari Andijonda yig‘ildi va o‘z qarorgohida dastlabki yig‘inga kirishdi. Ma’lum muddatlik ta’tildan qaytgan futbolchilar hozircha tiklanish mashg‘ulotlarini olib bormoqda.

Darvoqe, bosh murabbiy Ildar Sakayev Toshkentda o‘tayotgan “Pro” murabbiylik lisenziyasi uchun o‘qiyotgani munosabati bilan hozircha jamoa mashg‘ulotlarida ishtirok eta olmayapti. Shu bois mazkur yig‘inga Viktor Jalilov boshchilik qilmoqda. Unga Diyor Mirzaboyev va Qobil Olimjonov yaqindan yordam bermoqda.

Mashg‘ulotlar Bo‘ston dahasidagi “Viloyat BO‘FM” maydonida tashkil etilmoqda. Hozircha tarkibda asosan bu yil “Andijon” sharafini himoya qilgan futbolchilar va mahalliy yoshlarni ko‘rish mumkin.

Rejaga ko‘ra murabbiylar ushbu qisqa muddatlik yig‘in chog‘ida futbolchilarning imkoniyatlarini yana bir bor ko‘zdan kechiradi va talabga javob berganlarini yanvar oyida Toshkentda o‘tadigan yig‘inga taklif etadi.

Muxlislarning diqqat markazida turgan seleksiya ishlari bo‘yicha hozircha rasmiy ma’lumot yo‘q. Lekin bu bo‘yicha klub rahbariyati va murabbiylar shtabi maslahatlashgan xolda keng ko‘lamda ish olib bormoqda.

Xususan ortda qolgan besh kun mobaynida rahbariyat bir qator futbolchilar bilan uchrashib, muzokara o‘tkazdi va qaysidir ma’noda ularning ayrimlari bilan og‘zaki kelishuvga ham erishildi deyish mumkin. Faqat yangi futbolchilarning o‘z klubi bilan tuzgan shartnomasi muddati yakuniga yetmagani sababli, nomlar hozircha oshkor etilmayapti.

“Andijon” matbuot xizmati.