«Yuventus» bosh murabbiyi Massimiliano Allegri Italiya chempionati doirasidagi «Roma»ga qarshi bahs (1:0) haqida quyidagicha fikr bildirib o‘tdi. Uning so‘zlarini Football Italia chop etgan.

«Ha, biz qishki chempion bo‘ldik, lekin hali hech narsani yutganimiz yo‘q. Ikkinchi o‘rindagi «Napoli»ni yaxshigina ortda qoldirishimiz muhim ahamiyatga ega edi.

O‘yinni yaxshi o‘tkazdik, biz bosim ostida ham tartibni saqlab qola oldik. «Roma»da Robin Olsen bir nechta chiroyli seyvlarni amalga oshirdi.

Biz darhol raqibga muammo tug‘dirish va ularga bosim o‘tkazishni istagan edik, chunki «Roma» – psixologik jihatdan bardoshli jamoa emas. Ikkinchi bo‘limda to‘p ko‘proq ularda bo‘ldi, lekin hech qanday vaziyat yarata olishmadi. Biz g‘alabaga munosib bo‘ldik, deb hisoblayman», – deya ta’kidladi Allegri.

Eslatib o‘tamiz, kechagi bahsning 35-daqiqasida Mario Manjukich tomonidan urilgan gol uchrashuvda yagona bo‘lib qoldi.

Birinchi davra yakunigacha hali 2ta tur bor. 26 va 29 dekabr kunlari 18-19-tur o‘yinlari bo‘lib o‘tadi. Ushbu bahslarda qanday natija qayd etilishidan qat’iy nazar, «Yuventus» qishki ta’tilga birinchi o‘rinda yo‘l oladi – «Napoli» turinliklardan 8 ochkoga ortda qolmoqda.