«Ювентус» бош мураббийи Массимилиано Аллегри Италия чемпионати доирасидаги «Рома»га қарши баҳс (1:0) ҳақида қуйидагича фикр билдириб ўтди. Унинг сўзларини Football Italia чоп этган.

«Ҳа, биз қишки чемпион бўлдик, лекин ҳали ҳеч нарсани ютганимиз йўқ. Иккинчи ўриндаги «Наполи»ни яхшигина ортда қолдиришимиз муҳим аҳамиятга эга эди.

Ўйинни яхши ўтказдик, биз босим остида ҳам тартибни сақлаб қола олдик. «Рома»да Робин Ольсен бир нечта чиройли сэйвларни амалга оширди.

Биз дарҳол рақибга муаммо туғдириш ва уларга босим ўтказишни истаган эдик, чунки «Рома» – психологик жиҳатдан бардошли жамоа эмас. Иккинчи бўлимда тўп кўпроқ уларда бўлди, лекин ҳеч қандай вазият ярата олишмади. Биз ғалабага муносиб бўлдик, деб ҳисоблайман», – дея таъкидлади Аллегри.

Эслатиб ўтамиз, кечаги баҳснинг 35-дақиқасида Марио Манжукич томонидан урилган гол учрашувда ягона бўлиб қолди.

Биринчи давра якунигача ҳали 2та тур бор. 26 ва 29 декабрь кунлари 18-19-тур ўйинлари бўлиб ўтади. Ушбу баҳсларда қандай натижа қайд этилишидан қатъий назар, «Ювентус» қишки таътилга биринчи ўринда йўл олади – «Наполи» туринликлардан 8 очкога ортда қолмоқда.