O‘zbekiston terma jamoasi hujumchisi Sardor Rashidov Osiyo Kubogi oldidan O‘FA matbuot xizmatiga bergan intervyusida so‘nggi yillarda o‘yinida pasayish kuzatilayotganiga izoh berib o‘tdi.

– To‘rt yil oldingi Osiyo Kubogida ham qatnashgansiz. Saudiya Arabistoni bilan o‘yinda darvozabonning oyoqlari orasidan gol urgandingiz. Muxlislarni o‘sha Sardor Rashidovni kutishyapti. Lekin oxirgi 1-2 yil «Lokomotiv»da ko‘proq zaxirada qolib ketyapsiz. Bu jarohat bilan bog‘liqmi yoki rostan ham o‘yiningizda pasayish bo‘ldimi?

– To‘g‘risini aytaman, «Lokomotiv»da menga yuz foizlik imkon berilgani yo‘q. Bu narsani murabbiyga ham, jamoa rahbariyatiga ham aytganman – menga to‘la imkoniyat berilmadi. Ikkinchidan esa, boshqa davlatdan kelganimdan so‘ng o‘rganish biroz qiyin bo‘ldi. Chunki O‘zbekistonda oxirgi marta uch yil oldin o‘ynagandim. Xudo xohlasa, bu safargi Osiyo chempionatida to‘rt yil oldingidan ham yaxshiroq Sardor Rashidovni ko‘rishadi.

– Eshitishimizcha, Suriya bilan o‘rtoqlik uchrashuvidagi o‘yiningiz terma jamoa murabbiylariga yoqqan, ammo videoyozuvni kuzatishganidan so‘ng ularda Rashidov himoyaga qaytib o‘ynamas ekan, degan e’tiroz uyg‘ongan. Bu qanchalik rost?

– Himoyaga yordami tegmaydi, deyishgani haqida o‘zim ham eshitdim. To‘g‘risi, o‘zim ham tan olaman, yuz foiz orqaga qaytib, himoyaviy o‘yin ko‘rsatishga unchalik ham yo‘qman.

Qatar va Avstraliya bilan o‘yinlarda jarohatim ham bor edi. Chaqirilgan taqdirimda ham, terma jamoaga yordam bera olmasdim. Orqaga qaytib, [himoyaga] yordam bermasligim, men uchun dars bo‘ldi. Murabbiyning aytgan so‘zini eshitdim. Kelgusi o‘yinlarda orqaga qaytib, jamoaga yordam berib, murabbiy xohlaganidek yo‘l tutishga harakat qilaman.

– Qatarning «Al-Jaish» klubida o‘ynagan paytingizda Lamushining ham uslubi shunaqaroq bo‘lgan. O‘yinni himoyadan tashkil etish uslubi Kuperda ham azaldan bor. Shundan kelib chiqsak, balki sizga osonroq bo‘lar? Yoki Lamushi va Kuper taktikasi o‘rtasida farq bormi?

– Lamushi hujum uyushtiradigan uch nafar futbolchiga ortga qaytishni tavsiya qilmasdi. Ular old chiziqda qolib, faqat gol urish va jamoaga g‘alaba olib kelishini ko‘proq xohlardi. Endi, u – arab futboli.

Kuper – Yevropa futbolini ko‘rgan murabbiy. Har bir murabbiyning o‘z qarashi bor. Imkoniyat berilsa, bor kuchim bilan harakat qilib, gol urish kerak bo‘lganda gol urib, jamoaga yordam berishga intilamiz.