O‘zbek futbolining yorqin yulduzlaridan biri, 9 karra O‘zbekiston chempioni, Janubiy Koreya va Saudiya Arabistoni mamlakatlari chempioni, Osiyo qit’asining 2008 va 2011 yillardagi eng yaxshi futbolchisi, O‘zbekistonning 2008 hamda 2010 yillardagi eng yaxshi futbolchisi Server Jeparov Bekobodning “Metallurg” jamoasida yangi mavsum tayyorgarligini boshladi.
O‘zbekiston milliy terma jamoasida uzoq yillar sardorlik qilgan, hozirgacha milliy terma tarkibida eng ko‘p o‘yinda maydonga tushgan (126 uchrashuv), 2008 yilgi milliy chempionatimiz to‘purari bo‘lgan Server Jeparov bilan “Metallurg” futbol klubi rasmiy kelishuvga erishdi.
Futbolchi hamda klub o‘rtasidagi shartnoma Jeparovning tibbiy ko‘rikdan o‘tganidan keyin rasmiylashtiriladi va O‘zbekiston professional futbol ligasida ro‘yxatdan o‘tkaziladi.
Server Jeparov milliy chempiontimizning 267 uchrashuvida maydonga tushgan (2000-2001 – “Navbahor”, 2002-2007 – “Paxtakor”, 2008-2011 – “Bunyodkor”, 2016 – “Lokomotiv”). Mazkur uchrashuvlarda Jeparov raqiblari darvozasiga 116 ta to‘p kiritgan. O‘zbekiston klublaridan tashqari Janubiy Koreyaning “Seul” (2010-2011), “Sonnam” (2013-2014), “Ulsan Xyonde” (2015), Saudiya Arabistonining “Al Shabab” (2011-2013), Eronning “Sepaxon” (2017), “Istiqlol” (2017-2018), Qozog‘istonning “Jetisu” (2018) jamoalari sharafini ham himoya etgan.
