Bilasiz, O‘zbekiston Professional Futbol Ligasi yangi mavsum oldidan klublar oldiga bir qator talablarni qo‘ymoqda.

2019 yildan boshlab Superliga hamda Pro-liga “A” guruhida qatnashishni istagan klub yaxshi holatdagi maydoni bor stadion va o‘z akademiyasiga ega bo‘lishi shart etib belgilandi.

2019 yilga jiddiy hozirlik olib borayotgan “Surxon” futbol klubi bugun O‘FA huzuridagi Surxondaryo viloyati bolalar-o‘smirlar hududiy futbol akademiyasi bilan yosh futbolchilarni tayyorlash bo‘yicha shartnoma imzoladi. O‘zaro kelishuvga ko‘ra, klub akademiyadan yetishib chiqadigan iste’dodli o‘yinchilarni o‘z safiga jalb etish borasida katta imtiyozlarga ega bo‘ladi.

Shu boisdan “Surxon” futbol klubi va O‘FA huzuridagi Surxondaryo viloyati bolalar-o‘smirlar hududiy futbol akademiyasi o‘rtasida yosh futbolchilarni tayyorlash bo‘yicha tuzilgan shartnoma kuchga kirganidan boshlab, klub oldiga qo‘yilayotgan asosiy talablardan biri – akademiya bo‘yicha talabni bajargan deya sanaladi.