Yarim himoyachi Azizbek Turg‘unboyevni “Paxtakor” jamoasi bilan rasman kelishuvga erishgani haqida ma’lumotlar tarqaldi. Vaholanki Turg‘unboyevning "Navbahor" bilan amaldagi shartnomasi 2020 yilgacha mo‘ljallangan. Masalaga oydinlik kiritish maqsadida Azizbek bilan suhbat uyushtirdik.
- Bugun ko‘plab saytlarda sizni «Paxtakor» bilan kelishuvga erishganingiz haqida xabarlar tarqalib ketdi. Bu qanchalik haqiqat?
- «Paxtakor» jamoasi bilan muzokaralar bo‘lmagan deya olmayman. Ular bilan shartnomalar masalasida gaplashganmiz. Ammo, yakuniy qarorim «Navbahor»da qolib, chempionlik marrasini zabt etish. Mana shunday sharoitlarni yaratib berayotgan rahbarlar va muxlislar uchun jamoada qolishga qaror qildim.
- «Navbahor» jamoasi rahbariyati jamoada qolishingiz uchun sizga taklif qilgan shartnomaga imzo chekishga majbur bo‘lganingiz rostmi?
- Yo‘q, (kuladi) bunday narsa bo‘lmagan. Odamlar bunaqa gaplarni qayerdan topishadi hayronman. Har doim o‘z xohishim bilan shartnomaga imzo chekkanman. Bunga hech qanday shubha bo‘lishi mumkin emas.
- Yuqorida «Paxtakor» bilan kelishuv to‘g‘risida aytdingiz. Yakuniy qaroringiz esa «Navbahor»da qolish ekan kelajakda «Paxtakor» bilan hech qanday muammo bo‘lmaydimi?
- Bu masalada muammolar bo‘lmaydi deb o‘ylayman. «Navbahor» PFK rahbariyati masalani hal qilishini aytdi. «Paxtakor» klubi rahbariyati meni to‘g‘ri tushunishadi deb umid qilaman. E’tibor qilib jamoaga taklif qilganlarida xursandman va rahmat aytaman.
Ammo, yuragim «Navbahor»da. Namanganda futbolning ashaddiy, fidoiy muxlislari juda ko‘p. Jamoamizning shunday fidoiy muxlislari uchun, ularning hurmati uchun, yana «Navbahor»da qolaman. Ularning menga bo‘lgan ishonchlari uchun, qo‘llab-quvvatlab turganliklari uchun barchalariga rahmat deyman.
Farhod Umaraliyev suhbatlashdi
