Ertaga O‘zbekiston terma jamoasi Osiyo kubogi musobaqasidagi yurishini boshlaydi. Xabaringiz bor terma jamoamiz F guruhida Ummon bilan bahs olib boradi. O‘yin Toshkent vaqti bilan soat 18:30da boshlanadi.
Guruh bosqichidagi ilk o‘yin oldidan SPORT TV o‘zbekistonlik muxlislar uchun syurpriz tayyorlagan. Ya’ni Ummon va 3-turdan o‘rin olgan Yaponiya bilan o‘yin telekanal orqali jonli efirga uzatiladi.
Eng asosiysi birinchi o‘yinni Sharja shahridagi stadiondan turib sharhlovchi hamda jurnalist Xayrulla Hamidov sharhlab boradi.
Yuqori ehtimol bilan Yaponiyaga qarshi o‘yinni ham stadiondan jonli ravishda Xayrulla Hamidov sharhlashi kutilmoqda. Bu haqda, telekanal direktori Zohid Karimov Stadion.uz internet nashri muxbiri Akmal Eshonxonovga ma’lum qildi.
“O‘zbekistonlik muxlislarni musobaqaga qiziqtirish maqsadida terma jamoa ishtirokidagi o‘yinlarni stadionning o‘zidan sharhlashni maqsad qilgan edik. Bugun aynan mana shu masalada kelishuvga erishdik va MTJning ikki o‘yinini bevosita voqea joyidan turib, telekanalga jonli ravishda sharhlaymiz.
Albatta, sharhlovchi vazifasini siz kutgan va siz bilgan Xayrulla Hamidov bajarib beradi. Aytib o‘tish joiz, bungacha Osiyo kubogi musobaqasini SPORT TV tarixda ilk bora stadiondan turib O‘zbekistonga yetkazmoqda.
Harakatlarimizning barchasini muxlislar o‘zlariga bo‘lgan syurpriz sifatida qabul qilishadi deb umid qilaman”, deydi Zohid Karimov.
Akmal Eshonxonov
Sharja shahridan maxsus
