Эртага Ўзбекистон терма жамоаси Осиё кубоги мусобақасидаги юришини бошлайди. Хабарингиз бор терма жамоамиз F гуруҳида Уммон билан баҳс олиб боради. Ўйин Тошкент вақти билан соат 18:30да бошланади.
Гуруҳ босқичидаги илк ўйин олдидан SPORT TV ўзбекистонлик мухлислар учун сюрприз тайёрлаган. Яъни Уммон ва 3-турдан ўрин олган Япония билан ўйин телеканал орқали жонли эфирга узатилади.
Энг асосийси биринчи ўйинни Шаржа шаҳридаги стадиондан туриб шарҳловчи ҳамда журналист Хайрулла Ҳамидов шарҳлаб боради.
Юқори эҳтимол билан Японияга қарши ўйинни ҳам стадиондан жонли равишда Хайрулла Ҳамидов шарҳлаши кутилмоқда. Бу ҳақда, телеканал директори Зоҳид Каримов Stadion.uz интернет нашри мухбири Акмал Эшонхоновга маълум қилди.
“Ўзбекистонлик мухлисларни мусобақага қизиқтириш мақсадида терма жамоа иштирокидаги ўйинларни стадионнинг ўзидан шарҳлашни мақсад қилган эдик. Бугун айнан мана шу масалада келишувга эришдик ва МТЖнинг икки ўйинини бевосита воқеа жойидан туриб, телеканалга жонли равишда шарҳлаймиз.
Албатта, шарҳловчи вазифасини сиз кутган ва сиз билган Хайрулла Ҳамидов бажариб беради. Айтиб ўтиш жоиз, бунгача Осиё кубоги мусобақасини SPORT TV тарихда илк бора стадиондан туриб Ўзбекистонга етказмоқда.
Ҳаракатларимизнинг барчасини мухлислар ўзларига бўлган сюрприз сифатида қабул қилишади деб умид қиламан”, дейди Зоҳид Каримов.
Акмал Эшонхонов
Шаржа шаҳридан махсус
