O‘zbekiston terma jamoasi yarim himoyachisi Otabek Shukurov Ummon bilan qarshi o‘yndan so‘ng o‘z fikrlarini bildirib o‘tdi.

“Turnirda birinchi o‘yin bo‘lgani uchun, bu o‘yinning qiyin bo‘lishini bilardik. Raqib ham kuchli shakllangan jamoa ekanligi ko‘rniib turibdi. Men shu yerda o‘ynaganim sabab ummonliklarni oldindan bilaman.

Bu jamoa o‘z tarixdagi eng kuchlisi hisoblanadi. Ummon qanday kuchga ega ekanligini o‘yin vaqtida ham ko‘rdik. Shukur, qiynalgan bo‘lsakda musobaqani g‘alaba bilan boshladik.

Barcha o‘zbekistonlik muxlislarni bu g‘alaba bilan tabriklayman. Albatta, o‘zim to‘p tepadigan klub stadionida o‘ynash men uchun juda ham yoqimli. Sharja shahridagi muxlislar, qolaversa futbol klubim vakillari ham menga muxlislik qilishganini sezib turdim.

Muxlislarga katta rahmat, bizni qo‘llab-quvvatlashda davom etinglar! Nasib bo‘lsa, O‘zbekiston oldiga qo‘ygan maqsadni bajarishda doim olg‘a intilamiz.

Har bir o‘yinni finaldek o‘tkazishga harakat qilamiz. Turkmaniston bo‘ladimi, Yaponiya bo‘ladimi raqibga qarshi bir hil tayyorgarlik ko‘ramiz. Biz doim maqsad sari intilamiz”, deydi Otabek Shukurov.

Ma’lumot o‘rnida, Otabek Shukurov Sharja shahrining “Sharja” futbol klubida faoliyat olib boradi.