Avvalroq, 9 yanvar kuni “Lokomotiv” futbolchilari o‘quv-mashg‘ulot yig‘inlarini o‘tkazish uchun Dubayga yetib borgani haqida xabar bergan edik.
Futbolchilar va murabbiylar “Jebel Ali” mehmonxonasiga joylashishdi va u yerda tiklanish mashg‘ulotlarini olib borishdi. Shuni ham aytib o‘tish joiz, “temiryo‘lchilar” mashg‘ulotlariga Nemanya Jokich, Filipp Rayevas, Aziz Haydarov hamda Jamshid Iskanderov kabi yangi futbolchilar ham kelib qo‘shilgan.
“Loko” u yerda 2 hafta mobaynida mashg‘ulotlar o‘tkazadi. Mashg‘ulotlar kuniga 2 mahaldan olib boriladi. O‘zbekiston chempioni mazkur yig‘in davomida uchta o‘rtoqlik o‘yinini o‘tkazadi.
Dastlab, 16 yanvar kuni Rossiyaning “Spartak Moskva” jamoasiga qarshi bahs olib boriladi. So‘ngra 18 yanvar kuni Slovakiyaning 7 karra chempioni “Jilina” futbol klubi bilan kuch sinashiladi. 21 yanvar kuni esa Daniyaning “Brondbyu” jamoasiga qarshi maydonga tushiladi.
Ma’lumot o‘rnida, Dubaydagi yig‘in 24 yanvargacha davom etadi.
