Akmal Eshonxonov
Al-Ayn shahridan maxsus
Bugun, 15 yanvar kuni O‘zbekiston terma jamoasi Birlashgan Arab Amirliklarining Al-Ayn shahrida Yaponiyaga qarshi o‘yin uchun ikkinchi mashg‘ulotini o‘tkazdi.
Mashg‘ulot mahalliy BAA vaqti bilan soat 17:00 da “Xalifa bin Zayd” stadionining 3-maydonida boshlandi. Mashg‘ulotning 15 daqiqasi OAV uchun ochiq bo‘ldi.
O‘zbekiston terma jamoasining mashg‘ulotlariga hatto, yaponiyalik jurnalistlar ham tashrif buyurib, jamoamiz mashg‘ulotini diqqat bilan kuzatdilar.
Murabbiy Ektor Kuper asosan tezlikni oshirish va diqqat-e’tiborni jamlashga qaratilgan mashg‘ulotlarga urg‘u berdi. Futbolchilar ikki guruhga bo‘lingan holda, yerdagi fishkani kim birinchi bo‘lib olish, tayoqchalarni qo‘yib yuborib, keyin yerga tushguncha ilib olish mashqlarini o‘tkazishdi.
So‘ngra ikki guruhga bo‘lingan holda futbol o‘ynashdi. Darvozabonlar bilan esa Denis Ivankov alohida mashq olib bordi.
Ertaga Yaponiyaga qarshi o‘yinoldi rasmiy mashg‘uloti bo‘lib o‘tadi. Eslatib o‘tamiz, 17 yanvar kuni “Xalifa bin Zayd” stadionida O‘zbekiston milliy terma jamoasi guruh bosqichining so‘nggi o‘yinida Yaponiya bilan o‘ynaydi.
