«Barselona» klubi Ispaniya kubogidan chetlatilishi mumkin, deya yozmoqda ispan matbuoti.

El Mundo tarqatgan xabarga ko‘ra, kataloniyaliklar nimchorak final bosqichining «Levante»ga qarshi bo‘lib o‘tgan dastlabki o‘yinida (1:2) reglamentni buzishgan. "Ko‘k-anorranglilar" safida maydonga tushgan himoyachi Chumi Brandaris diskvalifikasiya uchragan futbolchi edi. Boisi, u «Barselona B» safida 5ta sariq kartochka olgan edi.

Tartib-intizom qo‘mitasining 56.3-bandiga ko‘ra: «O‘yinchi diskvalifikasiya muddatini o‘tamaguncha, boshqa jamoalar safida ham maydonga tusha olmaydi».

O‘z navbatida, «Barselona» o‘yin qoidalariga kiritilgan o‘zgarishlarni eslatib o‘tdi. Unga ko‘ra, kichik diskvalifikasiyalar futbolchi qaysi musobaqadan chetlatilgan bo‘lsa, faqat o‘sha turnirga taalluqli bo‘ladi.

2015 yilda "Real" shunga o‘xshash vaziyat qurboniga aylangandi. O‘shanda Denis Cherishev o‘zining avvalgi jamoasi — "Vilyerreal" safida olgan sariq kartochkalari yig‘ilib qolgani sababli, navbatdagi Kubok bahsini o‘tkazib yuborishi kerak edi. Bundan bexabar "Madrid" murabbiylari rossiyalik futbolchini maydonga tushirishi oqibatida jamoa Ispaniya kubogidan chetlatilgandi.

«Barselona» va «Levante» o‘rtasidagi javob o‘yini bugun tunda — Toshkent vaqti bilan 01:30da start oladi. Dastlabki o‘yinda Valverde shogirdlari 1:2 hisobida mag‘lub bo‘lishgan.