Qozog‘istonning Oskemen (Ust-Kamenogorsk) shahrida Olimpiada chempioni Olga Ripakova sovrini uchun an’anaviy beshinchi xalqaro musobaqa o‘tkazildi. Turnirda Qozog‘iston, Tojikiston, Turkiya, Armaniston, Gruziya, Belarus, Ukraina va O‘zbekistondan sportchilar ishtirok etishdi.

Ayollar o‘rtasida balandlikka sakrash bahslarida dastlabki ikki o‘rin hamyurtlarimizga nasib etdi. Safina Sadullayeva 192 sm balandlikni zabt etib, o‘z shaxsiy rekordini yangiladi va musobaqaning oltin medaliga sazovor bo‘ldi. Bu o‘zbek yengil atletikasi uchun beshinchi natija hisoblanadi. Bungacha Lyudmila Butuzova, Svetlana Radzivil hamda Nadiya Dusanova 198 sm, Svetlana Munkova (Ruban) 194 sm balandlikka sakray olgan.

Musobaqaning kumush medalini esa 188 sm natija ko‘rsatgan Nadiya Dusanova qo‘lga kiritdi. Balandlikka sakrash bahslarida ishtirok etgan uchinchi hamyurtimiz Alina Yablokova 175 sm natija bilan to‘rtinchi bo‘ldi.

800 metrga yugurish bahslarida Xurshid Ahmadaliyev 1:52.58 daqiqalik ko‘rsatkich bilan g‘alaba qozondi. 3000 metrga yugurishda Otabek Toshquvvatov 8:52.17 daqiqada oltinchi bo‘lib marraga yetib keldi. 60 metrga to‘siqlar osha yugurish bellashuvlarida Ergash Normurodov 8:21 soniya natija bilan beshinchi pog‘onadan joy oldi.

Uchxatlab sakrash yo‘nalishida ishtirok etgan sportchilarimiz mos ravishda 6-7-8 o‘rinlarni egallashdi (Ivan Denisov – 15.66 m, Dmitriy Pupko – 15.40 m, Ruslan Kurbanov – 15.33 m).

4x200 aralash estafetasida jamoamiz 1:36.67 natija bilan uchinchi o‘rinni egalladi. E’tiborlisi, ushbu estafetada Nadiya Dusanova ham o‘z omadini sinab ko‘rdi.