«PSJ» yarim himoyachisi Adriyen Rabyo jamoa bilan mojaroga bormoqda. 23 yoshli fransiyalik futbolchi o‘z klub ustidan Fransiya Liga-1 rahbariyati va futbolchilar kasaba uyushmasiga shikoyat qildi.

Rabyo murabbiy Tomas Tuxelning qaroriga ko‘ra "PSJ"ning yoshlar jamoasida shug‘ullanmoqda. U esa asosiy jamoaga qaytishni istamoqda.

«Adriyen Rabyo tezda «PSJ»ning asosiy tarkibiga qaytishi kerak. Aks holda klubga nisbatan sanksiya qo‘llanilishi mumkin. Huquqiy jihatdan «PSJ» Rabyoni o‘rinbosarlar safiga yuborishga haqli emas. Ular Ben-Arfa bilan ham shunday ish tutib, xatoga yo‘l qo‘yishgandi.

Agar futbolchi yaqin orada asosiy jamoaga qaytarilmasa-chi? Biz oldindan yuz berishi mumkin bo‘lgan narsani taxmin qila olmaymiz. Ammo kasaba uyushmasi vaziyatni diqqat bilan kuzatadi. «PSJ» vaqtdan yutishni istamoqda, ammo biz bunga yo‘l qo‘ymaymiz. Ayniqsa, qishki transfer muddati yakunlanishga yaqin qolganda.

Futbolchi o‘ziga mos sharoitda shug‘ullanishi kerak. Jamoa unga nisbatan hurmatni saqlashi lozim», – dedi kasaba uyushmasi vakili.

Avvalroq Rabyo «PSJ» bilan shartnomani uzaytirishdan bosh tortib, «Barselona» bilan kelishib olgani haqida xabarlar tarqalgandi. Uning parijliklar bilan shartnomasi ushbu mavsum so‘ngida yakunlanadi.