Madridning «Real» klubida ichki muhit barqaror emas — OAVda futbolchilarning o‘zaro va bosh murabbiy Alvaro Arbeloa bilan munosabatlarida muammolar borligi haqida xabarlar muntazam ravishda paydo bo‘lmoqda.
The Touchline nashri insayder Xose Feliks Diasga tayanib xabar berishicha, yaqinda jamoa himoyachisi Alvaro Karreras asosiy tarkibga kiritilmaganidan norozi bo‘lgan. Bosh murabbiy Arbeloa esa bunga juda qo‘pol tarzda javob qaytargan: u Karrerasga murabbiylik lisenziyasini olishni, murabbiy bo‘lishni va qarorlarni o‘zi qabul qilishni maslahat bergan.
Ma’lumot uchun, ushbu voqeadan so‘ng Karreras «Real Ovyedo»ga qarshi kechgan (2:0) uchrashuvda to‘liq 90 daqiqa harakat qildi. Bungacha esa u La Liganing ketma-ket uchta o‘yinida zaxira o‘rindig‘ida qoldirilgan edi.
