Bilasiz, Olmaliqning AGMK klubi 2019 yilgi mavsumda o‘z tarixida birinchi marta OFK Chempionlar Ligasida ishtirok etadi.
Jamoa ayni paytda yangi mavsumga qizg‘in tayyorgarlik jarayoni olib bormoqda. Olmaliqliklar OCHLda munosib ishtirok etish maqsadida tarkibni kuchaytirishga ham alohida e’tibor qaratmoqda. Shuningdek, yangi murabbiylar shtabi qo‘l ostida Toshkentda o‘tkazilgan ilk o‘quv-mashg‘ulot yig‘inida sinov-nazorat bellashuvlari ham tashkil etildi. Bugun AGMK poytaxt yig‘inini yakunladi.
Ertaga Olmaliq shahri jamoasi xorij yig‘ini o‘tkazish uchun BAAning Dubay shahriga yo‘l oladi. Yig‘inga jamoa 25 nafar futbolchi olib ketishi ko‘zda tutilgan. 23 yanvar – 4 fevral oralig‘ida AGMK Dubayda 4 ta sinov-nazorat o‘yinida ham maydonga tushadi. So‘ngra jamoa yurtimizga qaytib, o‘z uyida OCHL saralash o‘yiniga hozirlikni davom ettiradi.
Ta’kidlab o‘tish joizki, OCHL-2019 saralashi ikkinchi o‘tish bosqichi doirasida AGMK 12 fevral kuni Tojikistonning “Istiqlol” klubiga qarshi bahs olib boradi. O‘yin Olmaliqda bo‘lib o‘tadi.
