Avval xabar berib o‘tganimizdek, Farg‘onaning “Neftchi” jamoasi shu kunlarda Qirgulidagi “Neftchi” SK stadionida qishki o‘quv-mashg‘ulot yig‘inlarini olib bormoqda.

Klub matbuot xizmatining ma’lumot berishicha, Qirgulidagi yig‘inga bosh murabbiy Bahrom Haydarov boshchilik qilmoqda. Unga katta murabbiy Diyor Alijonov hamda yoshlar murabbiyi Abdusamad Do‘rmonovlar yordam berishmoqda. “Neftchi” a’zolarini jismoniy holatini yaxshilash borasida Ilhom Zaylobitdinov mehnat qilmoqda. Xislat Chilmatov esa doimgidek darvozabonlar bilan ishlayapti. Murabbiylar shtabi futbolchilarga ikki maxaldan mashg‘ulotlar o‘tkazishmoqda. Kecha oqshom bo‘lib o‘tgan mashg‘ulot davomida jamoa ikki guruhda bo‘lingan holda kichik bellashuv ham o‘tkazdi.

Jamoa bilan shartnomasi yakuniga yetgan bir qator o‘yinchilar “Neftchi” bilan xayrlashdi. Ijara muddati tugagan futbolchilar esa sobiq jamoalari safiga qaytib ketishdi. Ayni paytda “Neftchi” jamoasi safiga bir qator yangi futbolchilar kelib qo‘shilishmoqda. Agarda ushbu o‘yinchilarning xatti-harakatlari murabbiylar shtabiga ma’qul kelsa ular bilan shartnoma imzolanib, klub rasmiy sayti orqali e’lon qilinadi. “Neftchi” klubi rahbariyati o‘tgan mavsum davomida jamoa sharafini himoya qilgan bir qator o‘yinchilarni ortda qaytarish yoki ijara asosida klubga chorlash bo‘yicha muzokalar olib bormoqda. Ta’kidlash o‘rinliki, yangi futbolchilar borasida kelishuvlar rasman yakunlangach ularning ismi-shariflari ma’lum qilinadi.

Tez kunlarda Farg‘onada an’anaviy “Hokim Kubogi” bahslari boshlanadi. “Neftchi” jamoasi ham ushbu turnirda ishtirok etishi reja qilingan. Farg‘ona futbol assosiasiyasi tomonidan o‘tkaziladigan musobaqada Superliga, Pro-liga hamda qo‘shni Respublikadan bir qator jamoalar ishtirok etishini kutilmoqda.