O‘zbekiston Milliy olimpiya qo‘mitasida Respublika sport tibbiyoti ilmiy-amaliy markazi ilmiy kengashining yig‘ilishi bo‘lib o‘tdi. Unda Bosh kotib Jasur Matchanov, Respublika sport tibbiyoti ilmiy-amaliy markazi rahbari professor Abdushukur Sodiqov, sport tibbiyoti bo‘yicha mutaxassislar, markaz xodimlari ishtirok etishdi.
Bugungi kunda sport tibbiyotini rivojlantirish yo‘nalishida faoliyat olib borayotgan markaz zimmasida ulkan vazifalar turibdi. Shu boisdan, soha tibbiyoti oldida turgan vazifalarni izchil davom ettirishda ilmiy nazariyaning roli benihoya katta.
Yig‘ilish davomida ilmiy kengashning 2018 yilda amalga oshirgan ishlari sarhisobi va joriy yilgi rejalari tinglandi. Bundan tashqari, markaz faoliyatini takomillashtirish, asosiy strategiya, rivojlanish konsepsiyasi va ilmiy-tashkiliy masalalar muhokama qilinib, sport tibbiyoti, tibbiy va maxsus psixologiya yo‘nalishlari bo‘yicha tayanch doktorantura va mustaqil izlanuvchilikka qabul yakunlari haqida ham ma’lumot berildi. Shu bilan bir qatorda xalqaro hamkorlik masalalari ham muhokama qilindi. Yig‘ilishda so‘zga chiqqanlar kun tartibidagi mavzular yuzasidan o‘z fikr-mulohazalarini bildirishdi.
