Bilasiz, 2019 yilgi milliy chempionat o‘yinlari mart oyining birinchi sanasidan e’tiboran boshlanadi.

Ayni paytda Bekobodning “Metallurg” markaziy stadionida yangi mavsumga qizg‘in hozirlik ishlari olib borilmoqda.

Futbol maydoniga yangi sug‘orish tizimlari o‘rnatildi. Shuning barobarida poytaxtlik mutaxassislarning tavsiya hamda ko‘rsatmalariga binoan drenaj o‘rnatish ishlari ham olib borilyapti.

Maydonning katta qismida ta’mirlash ishlari yakunlandi. Keyingi haftadan maxsus texnika yordamida maydonga yana bir marta tuproq-qum yotqizish ishlari amalga oshirilib, uni tekislash-ravonlash jarayoniga o‘tiladi.

Tribunalardagi o‘rindiqlarni almashtirish ishlari ham yakunlanish arafasida. Tez orada futbolchilarning kiyinish, yuvinish xonalari, hakamlar, nazoratchi hakam, komissar xonalari ham joriy ta’mirdan chiqariladi.

Stadionda yoritish tizimi ham qayta ko‘zdan kechirilyapti, projektorlarni maydonga bir tekisda yo‘naltirish – sozlash ham mutaxassislar yordamida amalga oshirilyapti. Bir so‘z bilan aytganda “Metallurg” markaziy stadioni yangi mavsumga qizg‘in hozirlik ko‘rayapti.