Xabaringiz bor, O‘zbekiston kamondan otish federasiyasida yangi rahbariyat ish boshlaganidan so‘ng sportning ushbu yo‘nalishiga ham e’tibor oshdi. Merganlarimiz xorijiy musobaqalarda, o‘quv-mashg‘ulot yig‘inlarida ishtirok etishmoqda. Federasiya shuningdek paralimpiya yo‘nalishida ham ish olib bormoqda.

Bugun, 5 fevral kuni O‘zbekiston kamondan otish federasiyasida Rossiyadan tashrif buyurgan murabbiy Ildar Sayfulin bilan uchrashuv tashkil etildi. Unda bosh kotib Zafar Yusupov rossiyalik murabbiyga mamlakatimizda kamondan otish sportiga qaratilayotgan e’tibor, terma jamoa sportchilari oldiga qo‘yilgan vazifalar haqida gapirib berdi.

Shuningdek, O‘zbekiston nafaqat Olimpiya, balki Paralimpiya o‘yinlarida ham kamondan otish bo‘yicha munosib ishtirok etmoqchi ekanligi ta’kidlandi. Shu maqsadda Ildar Sayfulinga kamondan otish bo‘yicha O‘zbekiston paralimpiya terma jamoasida murabbiy sifatida faoliyat olib borish taklifi berildi.

O‘z navbatida rossiyalik murabbiy mamlakatimizda sportning ushbu turiga e’tibor oshib borayotganini, ushbu taklifga qarshi emasligini ma’lum qildi.

«O‘zbekistonda shaxsan mamalakat prezidenti ushbu sport turiniga befarq emasligini bilaman. U kishi Qashqadaryo viloyatiga tashrif buyurib, kamondan otish bazasining ochilish marosimida qatnashganligi quvonarli xolat. Men bu diyorda ishlab, paralimpiya sportchilariga o‘z yordamimni berishga, kerak bo‘lsa O‘zbekistonda qolib ishlashga tayyorman», – dedi murabbiy.

Mutaxassis 15-20 fevral kunlari Qo‘qon shahrida tashkil etiladigan O‘zbekiston qishki chempionatiga tashrif buyurib, iqtidorli sportchilarni saralab olish uchun taklif etildi.