Yangi mavsumga jiddiy tarzda tayyorgarlik ko‘rayotgan va o‘z oldiga yuksak maqsadlarni qo‘ygan Namanganning “Navbahor” klubi Turkiyaning Antaliya shahridagi o‘quv-mashg‘ulot yig‘inini bugun o‘z yakuniga yetkazadi. Jamoa a’zolari ertaga yurtimizga qaytishadi.

Namanganliklar Antaliyada 6-17 fevral kunlari yig‘in olib borib, uning doirasida 4 ta nazorat-sinov bahsi o‘tkazishdi.

Mazkur o‘rtoqlik uchrashuvlarida “lochinlar” Ruminiyaning “Universitatya - Kluj” klubini 1:0 hisobida mag‘lubiyatga uchratib, Gruziyaning “Metallurg” (Rustavi) va Polshaning “Stal” (Meles) jamoalari bilan 1:1 hisobidagi durangga imzo chekishgan bo‘lsa, Ukrainaning “Oleksandriya” klubidan 1:2 hisobida mag‘lubiyatga uchrashdi.

Andrey Kanchelskis shogirdlari Turkiyadan qaytishganidan so‘ng, qisqa muddatli ta’til olishadi va 20 fevraldan mashg‘ulotlar Namanganda davom ettiriladi.