Янги мавсумга жиддий тарзда тайёргарлик кўраётган ва ўз олдига юксак мақсадларни қўйган Наманганнинг “Навбаҳор” клуби Туркиянинг Анталия шаҳридаги ўқув-машғулот йиғинини бугун ўз якунига етказади. Жамоа аъзолари эртага юртимизга қайтишади.

Наманганликлар Анталияда 6-17 февраль кунлари йиғин олиб бориб, унинг доирасида 4 та назорат-синов баҳси ўтказишди.

Мазкур ўртоқлик учрашувларида “лочинлар” Руминиянинг “Университатя - Клуж” клубини 1:0 ҳисобида мағлубиятга учратиб, Грузиянинг “Металлург” (Рустави) ва Польшанинг “Сталь” (Мелец) жамоалари билан 1:1 ҳисобидаги дурангга имзо чекишган бўлса, Украинанинг “Олександрия” клубидан 1:2 ҳисобида мағлубиятга учрашди.

Андрей Канчельскис шогирдлари Туркиядан қайтишганидан сўнг, қисқа муддатли таътил олишади ва 20 февралдан машғулотлар Наманганда давом эттирилади.