Toshkentning “Bunyodkor” klubi yarimhimoyachisi Javlon Ibrohimov “qaldirg‘ochlar”ni safini tark etdi.

Ibrohimov Janubiy Koreya quyi divizionining “Suvon” klubi bilan shartnoma imzoladi. Bu haqda koreys klubi rasmiy sayti xabar tarqatdi.

Ta’kidlab o‘tish joiz, bu Koreya futbolining yetakchi klubi “Suvon Samsung Blyuingz” klubi emas, quyi liga vakili bo‘lgan boshqa “Suvon”.

Ayni vaqtda, 28 yoshda bo‘lgan Ibrohimov yangi jamoasida 70-raqamda o‘ynaydi. Shartnoma shartlari va bandlari oshkor qilinmadi.

"Suvon" FK o‘tgan yili musobaqada 7-o‘rinni band etgandi. Key-1 ligada jami 10ta jamoa ishtirok etadi. Musobaqa 4ta davradan iborat bo‘ladi.

Shu tariqa, ayni damda Janubiy Koreyadagi o‘zbekistonlik legionerlar soni uch nafarga yetdi. Oldinroq Rustam Ashurmatov «Gvanju»ga, Ikrom Aliboyev esa «Seul»ga o‘tgandi.