«Manchester Yunayted» klubi bosh murabbiyi vazifasini bajarayotgan Ule-Gunnar Sulsher «Liverpul»ga qarshi bo‘ladigan o‘yin oldidan o‘z fikrlarini bildirib o‘tdi.

«Albatta, «Liverpul» ancha yillardan beri Angliya chempioni bo‘lmagani uchun hozirda bosimni his qilmoqda. O‘ylashimcha, jamoaning barcha muxlislari va futbolchilari buni his qilib turishibdi.

«Manchester Yunayted» esa bir necha yillardan beri Premyer-ligada g‘olib chiqmadi. Vaziyatni o‘zgartirishni istaymiz. «MYU» top-4ga kirgani uchun xursand bo‘ladigan klubga aylanib qolmasligi kerak.

O‘z oldiga yuqori bo‘lmagan vazifani qo‘yib, uni bajargandan ko‘ra, yuksak vazifani qo‘yib, unga erishmaslik yaxshiroq.

«Liverpul»ning ko‘p muxlislari har yili jamoaning chempion bo‘lishini taxmin qilishadi, ammo oktyabr kelishi bilan: «Okey, keyingi mavsumda g‘olib chiqamiz», — deb aytishadi», — deya Sulsherning so‘zlaridan iqtibos keltirdi Sky Sports nashri.