Bugun O‘zbekiston yengil atletika federasiyasida “Nafosat-2019” ayollar spartakiadasi mehmoni hisoblanmish Yelena Isibnayeva bilan uchrashuv bo‘lib o‘tdi. Tadbir davomida jahon sporti afsonasi o‘zining taassurotlari va dil izhorlari bilan o‘rtoqlashdi.

“Qo‘rqmasdan ayta olamanki, mamlakatingiz rahbariyati sportni rivojlantirish uchun istiqbolli g‘oyalar bilan ishlamoqda. Yurtingizda uch haftadan so‘ng xalqaro marafon bo‘lib o‘tadi. Bu juda katta voqelik. Unda ko‘plab davlatlardan ishtirokchilar va mutasaddilar tashrif buyurib, musobaqa borasida o‘z fikrlarini bildirishadi.  O‘ylaymanki, bu O‘zbekistonda sport va yengil atletikaning rivoji uchun yaxshi impuls bo‘ladi. Eng asosiysi, 2030 yili bo‘lib o‘tadigan Osiyo o‘yinlariga mezbonlik qilish uchun kurashda sizlarga omad tilab qolaman. Aminmanki, shunday rivojlanishda niyatingizga yeta olasiz», – deydi Isinbayeva.

Yelena Isinbayeva tashrifi davomida 2002-2003 yillarda tug‘ilgan o‘smirlar o‘rtasidagi Markaziy Osiyo xalqaro musobaqasida g‘olib va sovrindor bo‘lgan yosh atletlarni taqdirlash marosimida ham ishtirok etdi.

Qolaversa, O‘zbekiston Davlat jismoniy tarbiya va sport universiteti mutasaddilari bilan yengil atletikaning rivoji borasida o‘tkazilgan suhbatda ham ishtirok etib, o‘zining qimmatli maslahatlarini ayamadi. Yig‘ilish yakunida faxriy mehmonga qimmatbaho sovg‘alar topshirildi.