O‘zbekiston terma jamoasining sobiq darvozaboni Ignatiy Nesterov ikki yil muddatga futboldan chetlatilishi mumkin. Bu haqda GoSport.uz internet-nashri manbalari xabar bermoqda.

Ma’lumotlarga ko‘ra, OFK tartib-intizom qo‘mitasi vaziyatni o‘rganib chiqqan va tez orada yakuniy xulosani taqdim etadi. Unda Nesterovning ikki yil muddatga diskvalifikasiya qilinishi haqida qaror chiqarilishi kutilmoqda. Hozircha bu borada rasmiy ma’lumot berilmagan.

Eslatib o‘tamiz, o‘tgan oyda Ignatiy Nesterovning qonidan taqiqlangan modda topilgani uchun vaqtinchalik chetlatilgani haqida xabar berilgandi. Ma’lum bo‘lishicha, Osiyo kubogi doirasidagi Ummonga qarshi uchrashuvdan so‘ng doping nazoratidan o‘tgan Nesterovning qonidan «sibutramin» moddasi topilgan. Bu modda odatda sportchilarning vazn tashlashiga yordam beruvchi preparat sanaladi. Uni o‘yin yoki musobaqalar vaqtida iste’mol qilish mumkin bo‘lmagan. Boshqa vaqtlarda, misol uchun o‘yinlar o‘tkazilmagan vaqtlarda bu preparatni iste’mol qilish mumkin bo‘ladi.

Ma’lumot uchun, Ignatiy Nesterov yanvar oyi so‘ngida Saudiya Arabistonining «Uhud» klubi safiga borib qo‘shilgandi. Oldinroq u terma jamoadagi faoliyatini yakunlangani haqida ma’lum qilgan.

Doping mojarosidan so‘ng, Nesterov «Uhud»dan Toshkentga qaytib keldi. Agar diskvalifikasiya amal qiladigan bo‘lsa, futbolchi klub bilan shartnomasini bekor qilishi mumkin.