«Yuventus» hujumchisi Krishtianu Ronalduning Yevropa chempionlar ligasi nimchorak final bosqichi doirasida bo‘lib o‘tgan javob o‘yinida qilgan qilig‘i «Atletiko»ga yoqmadi.

Portugaliyalik futbolchi o‘yin so‘ngida «Atletiko» bosh murabbiyi Diyego Simeone birinchi o‘yinda golni nishonlash paytida qilgan ishini takrorladi. Mazkur ish uchun UYEFA Simeoneni 20 ming yevro miqdorida jarimaga tortgandi.

As nashri tarqatgan xabarga ko‘ra, madridliklar ushbu qiliq uchun UYEFAga rasmiy shikoyat kiritishi mumkin.

«Atletiko»ning fikricha, Ronaldu qilgan ish Simeonenikiga nisbatan og‘irroq. Boisi, argentinalik murabbiy golni nishonlash paytida o‘z muxlislariga qarab turgan bo‘lsa, «Yuventus» hujumchisi bu ishni madridliklar muxlislarga qarab turib qildi.

Bundan tashqari, portugaliyalik futbolchi uchinchi golni urishdan oldin «Atletiko»muxlislariga qarata so‘kingani videokameralarga tushib qolgan.

Agar UYEFA Krishtianuga qarshi ish ochsa, futbolchi ham Simeone kabi jarimaga tortilishi mumkin.

Bundan tashqari, agar UYEFA portugaliyalik futbolchining harakatlarini zo‘ravonlikka undash deb hisoblasa, Ronaldu bir o‘yindan 3ta o‘yingacha diskvalifikasiya qilinishi mumkin.